കോഴിക്കോട്: പ്രളയത്തില്‍ വീട് മുങ്ങിയപ്പോള്‍ ആളുകള്‍ ദുരിതാശ്വാസ ക്യാമ്പുകളിലേക്ക് പാലായനം ചെയ്തപ്പോള്‍ പകരം വീട്ടില്‍ ഇടംപിടിച്ചത് മുതലയും ചെറുപാമ്പുകളും മുതല്‍ പെരുമ്പാമ്പ് വരെ. വെള്ളമിറങ്ങിയ ശേഷം വീട്ടിലേക്ക് തിരികെയെത്തുന്നവരെ കാത്തിരിക്കുന്നത് ജീവനു പോലും ഭീഷണിയാവുന്ന ഇത്തരം ജീവികളാണ്. പലരുടെയും വീട്ടിനകത്തു നിന്നും പരിസരപ്രദേശങ്ങളില്‍ നിന്നും വിഷപാമ്പുകള്‍, മുതല തുടങ്ങിയ ജീവികളെ കണ്ടെത്തിയിരുന്നു. വിഷപാമ്പുകള്‍, മുതല തുടങ്ങിയ ജീവികളെ വീടിനും പരിസരത്തും നിന്നായി കണ്ടെടുത്തു. ഇതിനു പിന്നാലെയാണ് പെരുമ്പാമ്പിനെയും കണ്ടെത്തിയിരിക്കുന്നത്.
കാറിന്റെ ബോണറ്റിനുള്ളില്‍ നിന്നുമാണ് പെരുമ്പാമ്പിനെ കണ്ടെത്തിയത്. കോഴിക്കോട് മേപ്പയൂരിന് സമീപം കീഴരിയൂര്‍ സ്വദേശി അബ്ദുള്‍ സലാമിന്റെ കാറിനുള്ളിലാണ് പെരുമ്പാമ്പിനെ കണ്ടെത്തിയത്. ഈ പ്രദേശത്ത് വലിയ തോതില്‍ വെള്ളപ്പൊക്കം ഉണ്ടായിരുന്നു. എന്നാല്‍ അബ്ദുള്‍ സലാമിന്റെ വീട് വെള്ളപ്പൊക്കത്തില്‍ മുങ്ങിയിരുന്നില്ല. കാറും വീടിന് മുന്നില്‍ തന്നെയായിരുന്നു. കാര്‍ സ്റ്റാര്‍ട്ട് ചെയ്യാന്‍ നോക്കിയെങ്കിലും സാധിച്ചില്ല, തുടര്‍ന്ന് ബോണറ്റ് ഉയര്‍ത്തിയപ്പോഴാണ് ഞെട്ടിക്കുന്ന കാഴ്ച കണ്ടത്.തുടര്‍ന്ന് അബ്ദുള്‍ സലാം നാട്ടുകാരെ വിളിച്ച് കൂട്ടുകയായിരുന്നു. ഇതോടെ സംഭവം അറിഞ്ഞ് വനംവകുപ്പ് ഉദ്യോഗസ്ഥരും സ്ഥലത്തെത്തി. പത്തടി നീളവും 32 കിലോ തൂക്കവും വരുന്ന പെരുമ്പാമ്പാണ് കാറിനുള്ളില്‍ വാസം തുടങ്ങിയത്. തത്കാലം വനശ്രീയിലാണ് പാമ്പിനെ പാര്‍പ്പിക്കുക.
